ሰንበት ትምህርት ቤታችን ለረጅም ዓመታት በብዙ አገልግሎት የተቃኘ ሲሆን እነዚህን አገልግሎቶች ከመቼውም ጊዜ በይበልጥ በአሁን ሰዓት የአገልግሎት አድማሱን በማስፋት በተለይም ሰፊውን ምዕመን ታሰቢ ያደረጉ የትምህርት መርሃ ግብሮችን በመዘርጋት ቃለ እግዚአብሔርን በስፋት ለማዳረስ ዘርፈ ብዙ ጥረት እየተደረገ ይገኛል፡፡ በተለያዩ አካባቢዎች ማለትም (አዲስ አበባም ከአዲስ አበባም ውጪ) የሚገኙ ምዕመናን ፣ የአጥቢያው ምዕመናን ፣ ሰንበት ተማሪዎችን ፣ የአካባቢውን ታዳጊ ወጣቶችን ያማከለ በተለያየ መልኩ የትምህርት መርሃ ግብር በመቅረፅ ቃለ እግዚአብሔር እንዲታላለፍ ከፍተኛ እንቅስቃሴ ይደረጋል፡፡

ከዚህም በተጨማሪም በሰንበት ትምህርት ቤታችን በቋሚነት ነዳያንን የማስተማር ፣ የመመገብ እንዲሁም የተለያዩ ቁሳቁሶችን ድጋፍ የሚደረግበት መርሃ ግብር ሲኖር በዚህ መርሃግብር ነዳያንን በቁሳቁስ ከመደገፍ በተጨማሪ ቃለ እግዚአብሔርን እንዲማሩ እንዲያውቁ ከፍተኛ ስራ ይሰራል፡፡ በተጨማሪም አጥቢያው ምዕመናን የሚያሳትፍ የንግስ ክብረ በዓል ጉዞ እንዲሁም የገዳማ ጉብኝት ጉዞ በተለያዩ ጊዜያቶች እየተዘጋጁ ምዕመናን በረከት እንዲያገኙ ከፍተኛ ስራ ይሰራል፡፡

ጋብቻቸውን በቤተክርስቲያን የሚያደርጉ ምዕመናን የሰርጋቸው ዕለት በዝማሬ በልዩ መልኩ በማጀብ በቤተክርስቲያን የሚደረጉ ሰርጎች በአጠቃላይ ውብ እና አስደሳች እንደሆኑ እና ብዙ ምዕመናን ሰርጋቸውን በቤተክርስቲያን ለማድረግ እንዲነሳሱ ትልቅ አስተዋፅኦ በሰንበት ትምህርት ቤታችን ይደረጋል፡፡ እንዲሁም የዝማሬ ቪዲዮ ቀረፃ ላይ ከዘማሪያን ጋር አብሮ በመሆን አገልግሎት ይከወናል፡፡ በሰንበት ትምህርት ቤታችን ከህፃናት ጀምሮ እስከ ጉልምስና እድሜ ክልል ላይ የሚገኙ ቁጥራቸው ከሺህ የሚበልጡ አባላትን በውስጡ በመያዝ አመቱን ሙሉ በደብሩ የሚከበሩ በዓላትን እንዲሁም ሌሎች ደብራት ላይ በመሄድ በደብሩ የሚከበሩ የንግስ በዓላትን በጋራ በመሆን የማገልግል እና ቤተክርስቲያን በምትፈልገው ስራ በአጠቃላይ የመሳተፍ ዘገልግሎት በስፋት ይከወናል፡፡

ሰንበት ትምህርት ቤታችን ላለፉት 41 ዓመታት በደብራችን ቅጽር በሚገኙ ሁለት ቦታዎች ላይ ማረፊያውን አድርጎ ሰፊ የሆነ አገልግሎት ሲሰጥበት ቆይቷል፡፡ ይሁንና የሰንበት ትምህርት ቤቱ አገልግሎት ዘርፈ ብዙ በመሆኑ እና ከፍተኛ የሆነ የአባል ብዛት በመኖሩ በአዳራሽ ጥበት ብዙ እንግልት አሳልፈናል፡፡ ይሁን እና ሰንበት ትምህርት ቤታችን አዲስ ሁለገብ የሆነ ሕንፃ ግንባታ ለመጀመር እና የአገልግሎት አድማሳችንን ለማስፋት የካቲት 11/2016 ዓ.ም የአዲስ አበባ ሀገረ ስብከት ሊቀ ጳጳስ እና የተዋሕዶ ሚዲያ የበላይ ጠባቂ እና የቅዱስ ሲኖዶስ አባል በሆኑት በብፁዕ አቡነ ሄኖክ አማካኝነት የሠሰረት ድንጋይ ተቀምጧል፡፡